ප්‍රදේශ කිහිපයකට ගංවතුර අවධානමක්

පවතින අධික වර්ෂාව හේතුවෙන් ගංගා කිහිපයක ජලමට්ටම් තවදුරටත් ඉහළ යමින් පවතින බව වාරිමාර්ග දෙපාර්තමේන්තුවේ ජලවිද්‍යා හා ආපදා කළමනාකරණ අංශය නිවේදනය කරනවා.

ඒ අනුව,

පනාදුගම ප්‍රදේශයෙන් නිල්වලා ගඟේ ජල මට්ටම සුළු ගංවතුර තත්ත්වයක් දක්වා වර්ධනය වී ඇති අතර එම තත්ත්වය තවදුරටත් ඉහළ යමින් පවතින බව සඳහන්.

තලහගගොඩ ප්‍රදේශයෙන් ද නිල්වලා ගඟේ ජල මට්ටම අවධානයෙන් පසුවිය යුතු මට්ටම දක්වා වර්ධනය වී තිබෙනවා.

ඉදිරි පැය 24 තුළ කොටපොළ, පිටබැද්දර, පස්ගොඩ , අකුරැස්ස, අතුරුලිය , මාලිම්බඩ තිහගොඩ , මාතර සහ දෙවිනුවර යන ප්‍රාදේශීය ලේකම් කොට්ඨාසවල පහත්බිම් වල ගංවතුර තත්ත්වයක් ඇතිවිය හැකියි.

මේ අතර අධික වර්ෂාව සමග අත්තනගලු ඔයේ ජල මට්ටම ද ඉහළ යමින් පවතිනවා.

ගිං ගඟේ ජල මට්ටම ද ඉහළ යමින් පවතින අතර බද්දේගම සහ තවලම ප්‍රදේශවලින් අවධානයෙන් පසුවිය යුතු මට්ටම දක්වා වර්ධනය වී තිබෙනවා.

කළු ගඟේ අතු ගංඟාවක් වන කුඩා ගඟේ ජල මට්ටම ද ඉහළ යමින් පවතින බව නිවේදනයේ සඳහන්.