වැලිකඩ බන්ධනාගාරයට ඇතුල්වීම ප්‍රතික්ෂේප කිරීම ගැන මානව හිමිකම් කොමිසමෙන් දැඩි අවධානය

කොළඹ – ශ්‍රී ලංකා මානව හිමිකම් කොමිෂන් සභාව (HRCSL) 2026 ජූලි 7 දින වැලිකඩ බන්ධනාගාරයට සිය නිලධාරීන්ට ප්‍රවේශය ප්‍රතික්ෂේප කිරීම සම්බන්ධයෙන් බරපතළ කනස්සල්ල පළ කර තිබේ.

1996 අංක 21 දරන ශ්‍රී ලංකා මානව හිමිකම් කොමිෂන් සභා පනත අනුව, පූර්ව දැනුම්දීමකින් තොරව ඕනෑම රැඳවුම් ස්ථානයකට ඇතුළු වී පරීක්ෂා කිරීමේ නීතිමය බලය කොමිසමට හිමි බව එම නිවේදනයේ සඳහන් වේ.

මේ සම්බන්ධයෙන් 2026 ජූලි 14 දින HRCSL සභාපති විනිසුරු එල්.ටී.බී. දේහිදෙණියගේ ප්‍රධානත්වයෙන් පැවති සාකච්ඡාවකදී බන්ධනාගාර නිලධාරීන් පවසා ඇත්තේ, එදින බන්ධනාගාරය තුළ පැවති අස්ථාවර ආරක්ෂක තත්ත්වයක් හේතුවෙන් ප්‍රවේශය ලබාදීමට නොහැකි වූ බවයි. එම තත්ත්වය පිළිබඳ කොමිසමේ නිලධාරීන්ට කාලෝචිතව දැනුම් නොදීම සම්බන්ධයෙන් කනගාටුව පළ කළද, එම පැහැදිලි කිරීම සම්බන්ධයෙන් තමන් සෑහීමකට පත් නොවන බව මානව හිමිකම් කොමිසම සඳහන් කරයි.

එමෙන්ම, මීගමුව බන්ධනාගාරයේ සිට වැලිකඩ බන්ධනාගාරයට මාරු කළ රැඳවියන්ට එරෙහිව පළිගැනීමේ ක්‍රියා, වධහිංසා, වෛද්‍ය ප්‍රතිකාර ප්‍රතික්ෂේප කිරීම, ඔවුන්ගේ පවුල්වලට රැඳවියන්ගේ ස්ථානය පිළිබඳ තොරතුරු ප්‍රමාද වී දැනුම්දීම සහ දඬුවම් කාලය අවසන් කළ ඇතැම් රැඳවියන් තවදුරටත් රඳවා තබා ගැනීම පිළිබඳද කොමිසම සිය අවධානය යොමු කර තිබේ.

මානව හිමිකම් කොමිසම සඳහන් කළේ මීගමුව බන්ධනාගාර සිද්ධියෙන් අනතුරුව වාර්තා වූ වධහිංසා, අමානුෂික සැලකීම් සහ බන්ධනාගාර තුළ සිදුවූ මරණ සම්බන්ධ විමර්ශන තවදුරටත් ක්‍රියාත්මක කරන බවයි.

ඒ අනුව වැලිකඩ බන්ධනාගාර බලධාරීන් වෙත නිර්දේශ කිහිපයක් ද නිකුත් කර ඇති අතර, මානව හිමිකම් කොමිසමේ නීතිමය බලතල පිළිගෙන පූර්ණ සහයෝගය ලබාදීම, රැඳවියන්ට එරෙහි පළිගැනීම් වැළැක්වීම, රැඳවියන්ගේ පවුල්වලට ඔවුන්ගේ ස්ථානය පිළිබඳ කඩිනමින් දැනුම්දීම සහ දඬුවම් කාලය සම්පූර්ණ කළ රැඳවියන් ප්‍රමාදයකින් තොරව නිදහස් කිරීම ඇතුළු පියවර ගන්නා ලෙස දැනුම් දී තිබේ.