ගෑස් ලිප් රතු එළි පෙන්වයි. සෙසු ලිප් ගෑස් පෙන්වයි

පවතින ගෑස් ප්‍රශ්නය නිසා ගෙවල්වල පැත්තකට දමා තිබූ උපකරණයක් නැවත සර්විස් කොට භාවිතයට ගන්නට බො​හෝ දෙනාට සිදුවිය. ඒ මෙතෙක් කලක් කුස්සියේ පැත්තට දමා තිබූ භූමිතෙල් ළිපය. කලක්පූජනීයත්වයෙන් සලකන ලද්දේ ගෑස් ළිප හෝ විදුලි ළිප නොහොත් හොට් ප්ලේට් එකය. භූමිතෙල් ළිප ලංකාවේ ගෑස් ආක්‍රමණයත් සමග ජනතාවගෙන් දුරස් වීමට ප්‍රධාන හේතුවක් වූයේ භූමිතෙල් නොහොත් ලාම්පු තෙල් කුකර්වල හදන කෑමවල භූමිතෙල් රහක් එනවා යැයි පොදු ජනතාව අතර ඇතිවූ කුප්‍රකට මතයට හේතුවාසනා වන්නටය.

එහෙත් අවසානයේ අනාථ වූ ජනතාව, සනාථ කරන්නට ආවේ ‘භූමිතෙල්’ ළිපය. දර ළිප අභාවයට ගිය නිසා අඩු ඉඩකඩක ලේසියෙන් ඉවුම් පිහුම් කරගන්නට බොහෝ දෙනා අලුතින් භූමිතෙල් ළිප් පවා ගන්නට පෙලඹුණේ මේ නිසාය. නමුත් භුමිතෙල් ළිප් අද වෙළඳපොලේ හිඟ ට. තිබුණොත් එය ගිනි ගණන් ය. එකල සිය ගණනට විකිණුනු කිසිවෙකු මිලදී නොගත් භූමිතෙල් ලිප අද දහස් ගණන් වේ. රුපියල් 4000ත් 6000ත් අතර ගණනකට නම් මිලදී ගැනීමට අවකාශ පවතී. වෙනත් විදුලි ලිප් ද හිඟ ය. සිංගර් වැනි ආයතනයකට ගිය විට එහි සේවිකාවන් ගේ මුහුණට සිනහවක් පැමිණේ. ඒවා නම් ස්ටොක් ඉවරයි සර්….

———————————————————————————————————–

ලංකාවට භූමිතෙල් ළිප් එන්නට පෙර කාලයේ අද මෙන් වැහි කාලවල එළියේ කුස්සියේ බිත්තියට හේත්තු කළ දර සුලබ දසුනක් විය. භූමිතෙල් කුකර් ඈත එකල නාගරික ජීවිතේ සමාජ තත්ත්වය පෙන්වන මෙවලමක්ද විය. විදුලි බලයෙන් ක්‍රියාත්මක හොට් ප්ලේට්ද කලක් මෙරට ගෘහණියන්ගේ ආහාර පිසින ප්‍රධාන උපකරණයක් විය.

විදුලිබල මණ්ඩලය පළ කළ දැන්වීමෙන් කියැවුණේ හොට් ප්ලේට්වලින් ආහාර පිසීම හා හීටර්වලින් වතුර රත් කිරීම සල්ලි කාබාසිනියා කරන අධික වියදම් සහිත කටයුත්තක් බවය. මේ නිසා හොට් ප්ලේට් හා හීටර් මුළුතැන්ගෙයින් අභාවයට ගියත් ඉඳහිට හෝ භාවිතයට බොහෝ ගෙවල්වල භූමිතෙල් කුකර් එක පැත්තකට දමා තිබුණේ විනෝදයට මෙනි.

නමුත් අපේ පොදු ජනතාව භූමිතෙල් ළිප සමග තිබුණ සබඳතාව මුළුමනින් අත්හැරියේ නැත. මේ අතරින් වතුකරයේ ජනතාව තවමත් සියයට හැත්තෑ පහකට වඩා භාවිත කරන්නේ භූමිතෙල් ළිපය. දැන් දැන් භූමිතෙල් කුකර්වලට දැමීමට වඩා භාවිත වන්නේ බස් රථවලට ඩීසල් වෙනුවට භූමිතල් ගැසීමටය.

සුදු යකඩ කුකර් මිලෙන් අධිකය. භූමිතෙල් ළිපෙන් උයන විට ඇළුමිනියම් භාජනවල කළු දුම බැඳීම දැන් කුකර්වල සිදු නොවේ. ඒ සඳහා පැට්‍රෝල්මැක්ස් එකේ මෙන් හුළං ගසා නිල් දැල්ල ගතහැකි භූමිතෙල් කුකර් දැන් වෙළෙඳපොළේ ඇත.

ගැනුම්කරුවන් බොහොමයකගේ අදහස්වලින් පෙනී ගියේ නැවතත් මෙරට මුළුතැන්ගෙවල්වලට භූමිතෙල් කුකර් එක ආගමනය වී ඇති බවත් ගෑස් හිඟයක් නැවත ඇතිවුවත් බය නැතුව උයන්නට ස්ටෑන්ඩ්බයි තියාගන්නට දැන් ඉතින් භූමිතෙල් කුකර් එකක්ද මුළුතැන්ගෙට අලුතෙන් එක්වූ බවය.