ලොස් ඇන්ජලීස්හිදී ශ්‍රී ලාංකික ඇඟලුම් සේවිකාවකට යුක්තිය ඉල්ලා විරෝධතාවක්

Victoria’s Secret විලාසිතා දැක්ම අතරතුර පුෂ්පලතාගේ මරණය ගැන අවධානය යොමු කරයි

ඇමරිකාවේ ලොස් ඇන්ජලීස් නුවර පැවති ලෝක ප්‍රකට Victoria’s Secret විලාසිතා දැක්ම අතරතුර, ශ්‍රී ලාංකික ඇඟලුම් සේවිකාවකගේ මරණය සම්බන්ධයෙන් යුක්තිය ඉල්ලා විරෝධතාවක් පැවැත්වුණා.

2026 ඔක්තෝබර් 18 වැනිදා කැලිෆෝනියාවේ Culver City හි Sony Pictures Studios පරිශ්‍රය ඉදිරිපිට පැවති මෙම විරෝධතාවේදී, ශ්‍රී ලංකාවේ Brandix ඇඟලුම් කම්හලක සේවය කළ පුෂ්පලතා පරමසිවම් නමැති සේවිකාවගේ මරණය සම්බන්ධයෙන් සාධාරණයක් විරෝධතාකරුවෝ ඉල්ලා සිටියා.

Global Labor Justice සහ Asia Floor Wage Alliance ඇතුළු කම්කරු අයිතිවාසිකම් සංවිධාන මෙම සිද්ධිය සම්බන්ධයෙන් අවධානය යොමු කරමින්, ඇඟලුම් කර්මාන්තයේ සේවිකාවන්ගේ අයිතිවාසිකම් ආරක්ෂා කිරීමේ අවශ්‍යතාව අවධාරණය කර තිබේ.

විරෝධතා කරුවන් පැවසු පරිදි, පුෂ්පලතා 2025 ඔක්තෝබර් 10 වැනිදා සේවයේ නිරතව සිටියදී අසනීප වී ඇති අතර, වෛද්‍ය ප්‍රතිකාර ලබාගැනීම සඳහා සේවා ස්ථානයෙන් පිටවීමට අවසර ඉල්ලා තිබේ. එහෙත් ඇයට සේවා මුරය අවසන් වනතුරු රැඳී සිටීමට සිදුවූ බවත්, පසුව රෝහල්ගත කිරීමෙන් පැය කිහිපයකට පසු ඇය මියගිය බවත් එම සංවිධාන පවසයි.

පුෂ්පලතාගේ මරණයෙන් අනතුරුව ඒ සම්බන්ධයෙන් සාධාරණය ඉල්ලා හඬ නැඟූ ඇගේ පවුලේ සාමාජිකයන්ට, සේවකයන්ට සහ වෘත්තීය සමිති නියෝජිතයන්ට තර්ජන, හිරිහැර හා පළිගැනීම් එල්ල වූ බවටද අදාළ සංවිධාන චෝදනා කර තිබේ. මෙම චෝදනා සම්බන්ධයෙන් ස්වාධීනව තහවුරු කළ තොරතුරු සහ අදාළ සමාගම්වල ප්‍රතිචාරද වැදගත් වේ.

විරෝධතාකරුවන්ගේ ප්‍රධාන ඉල්ලීම් අතර පුෂ්පලතාගේ මරණය සම්බන්ධයෙන් වගවීම තහවුරු කිරීම, සේවකයන්ට එරෙහි තර්ජන හා පළිගැනීම් නතර කිරීම සහ ඇඟලුම් කර්මාන්තයේ සේවිකාවන්ට ආරක්ෂිත සේවා පරිසරයක් සහතික කිරීම ඇතුළත් වේ.

මෙම සිද්ධිය ශ්‍රී ලංකාවේ ඇඟලුම් කර්මාන්තයේ සේවක අයිතිවාසිකම්, සේවා ස්ථානවල සෞඛ්‍ය හා ආරක්ෂාව සහ ජාත්‍යන්තර විලාසිතා සන්නාමවල සැපයුම් දාමවල වගකීම පිළිබඳව යළිත් ප්‍රශ්න මතු කර තිබේ.