චෙන්නායි හි දී ගැටුමක් දුර දිග යාමෙන් යතුරුපැදියක ගමන් ගත් ශ්‍රී ලාංකික තරුණියක් මෝටර් රථයකින් හප්පා ඝාතනය කරයි

ඉන්දියාවේ තමිල්නාඩු ප්‍රාන්තයේ චෙන්නායි නගරයේ කොයම්බේඩු පාලම අසලදී සිදු වූ අනතුරකින් වයස අවුරුදු 18ක් වූ ශ්‍රී ලාංකික තරුණියක් ජීවිතක්ෂයට පත්ව ඇති අතර ඇය සමඟ සිටි තවත් තරුණියක් බරපතළ තුවාල ලබා රෝහල්ගත කර තිබේ.

පොලිසිය පවසන්නේ, මියගිය තරුණිය වන යාන්සි (Yansi) සහ ඇයගේ 17 හැවිරිදි මිතුරිය පසුගිය මැයි 30 වැනිදා රාත්‍රියේ කොයම්බේඩු ප්‍රදේශයේ පෞද්ගලික සමාජ ශාලාවකට ගොස් සිට ඇති බවත්,එහිදී ඔවුන් තම මිතුරන් සමඟ නර්තනයේ යෙදී සිටියදී තවත් තරුණ පිරිසක් සමඟ වාදයක් ඇතිවී ඇති අතර එය ඉක්මනින් ගැටුමක් දක්වා වර්ධනය වී තිබේ.

සමාජ ශාලාවේ ආරක්ෂක නිලධාරීන් මැදිහත් වී තත්ත්වය පාලනය කර දෙපාර්ශ්වයම එම ස්ථානයෙන් පිටත් කර යවා ඇත. කෙසේ වෙතත්, සමාජ ශාලාවෙන් පිටත වෙළඳසැලක් අසලදීද දෙපාර්ශ්වය අතර තවත් බහින්බස් වීමක් හටගෙන ඇති අතර එහිදීද ආරක්ෂක නිලධාරීන් මැදිහත් වී ඔවුන් විසුරුවා හැර තිබේ.

ඉන් අනතුරුව යාන්සි සහ ඇයගේ මිතුරිය යතුරුපැදියකින් තිරුමංගලම් දෙසට ගමන් කරමින් සිටියදී, මිතුරිය විසින් තරුණයින්ගේ මෝටර් රථය දෙසට ගල් ප්‍රහාරයක් එල්ල කර ඇති බව පොලිසිය සඳහන් කරයි.

එම ක්‍රියාවෙන් කෝපයට පත් වූ මෝටර් රථයේ සිටි තරුණයින් වේගයෙන් රථය ධාවනය කර යතුරුපැදියේ ගැටීමෙන් මෙම අනතුර සිදුව තිබේ.

අනතුරින් යාන්සි එම ස්ථානයේදීම මියගොස් ඇති අතර ඇයගේ මිතුරිය බරපතළ තුවාල ලබා චෙන්නායිහි කිල්පෝක් රජයේ රෝහලට ඇතුළත් කර ප්‍රතිකාර ලබාදෙමින් සිටී.

සිද්ධිය සම්බන්ධයෙන් පුද්ගලයින් හය දෙනෙකු අත්අඩංගුවට ගෙන ඔවුන්ව අධිකරණයට ඉදිරිපත් කර ඇති බව හින්දුස්ථාන ටයිම් පුවත් අඩවිය සදහන් කරනවා. අත්අඩංගුවට ගත් සැකකරුවන් ලෙස 21 හැවිරිදි බලගුරු, 19 හැවිරිදි ජෝෂුවා සහ 19 හැවිරිදි කිෂෝර්කුමාර් හඳුනාගෙන ඇත.

අදාළ අපරාධයට යොදාගත් මෝටර් රථයද පොලිස් භාරයට ගෙන ඇති අතර පලාගොස් සිටින අනෙක් සැකකරුවන් අත්අඩංගුවට ගැනීම සඳහා විශේෂ පොලිස් කණ්ඩායමක් පත් කර ඇත.

සිද්ධිය පිළිබඳ වැඩිදුර විමර්ශන ක්‍රියාත්මක වේ.