වංචා සහගත මූල්ය ආයතනවල අයථා ක්රියා සහ වංචා පිළිබඳ පැමිණිලි දිනෙන් දින ඉහළ යන අතර කලකට ඉහත තිලිණි ප්රියමාලි සම්බන්ධ මූල්ය ආයතනයක කටයුතු ද රට පුරා මහත් ආන්දෝලනයක් ඇති කළා.
එම සමයේදී “ද ලයිෆ් ට්රැවලර්” නාළිකාව මූල්ය අයථා ක්රියාවන් පිළිබඳව වැඩසටහනක් විකාශය කළා.
ඒ, මූල්ය ගණුදෙනුවක් සඳහා පුද්ගලයෙකු පොළඹවා ගැනීම සඳහා කරන උත්සහයක් පිළිබඳව දුරකථන සංවාදයක හඬපටයක්ද සමඟයි.
ලෝක වෙළඳ මධ්යස්ථානයේ කාර්යාලයක් පවත්වාගෙන යමින් සිටින බව කී කෝප්රස් නමැති සමාගමක් එම වැඩසටහන අළලා ලයිෆ් ට්රැවලර් ආයතනයට එරෙහිව අධිකරණයේ නඩුවක් ගොනු කළා.
ඒ අදාළ වැඩසටහනෙන් සිය සමාගමට අගතියක් වූ බව පවසමින්.
එහිදී ලයිෆ් ට්රැවලර් වෙත වාරණ නියෝගයක් පැනවුණ අතර ඒ අනුව එම ආයතනයේ නම සඳහන් කරමින් (Copreus) කිසිදු ප්රවෘත්තියක් හෝ වාර්තාවක් ජනතාව වෙත ගෙන ඒම ලයිෆ් ට්රැවලර් ආයතනය වෙත තහනම් වුණා.
අදාළ සමාගම නඩුව ගොනු කර තිබුණේ “ද ලයිෆ් ට්රැවලර්” නාළිකාවේ හිමිකරු වන මනෝජ් රත්නායකට සහ අදාළ හෙළිදරව්ව අඩංගු හඬපටය සහිත වැඩසටහන ඉදිරිපත් කළ මාධ්යවේදී ධනංජය නාරංබැද්දට එරෙහිවයි.
එම මූල්ය සමාගමට අපහසයක් හා අපකීර්තියක් වන අසත්ය හා ද්වේෂ සහගත කරුණු ප්රචාරය නොකළ යුතු බවට ලයිෆ් ට්රැවලර් නාළිකාවට හා එහි ෆේස්බුක් පිටුවට වාරණ නියෝගයක් පැණවුණේ ඒ අනුවයි.
කොළඹ ප්රධාන දිසා විනිසුරු ලෙස ඒ මොහොතේදී පූර්ණිමා පරණගම විනිසුරුවරිය මෙම නියෝගය නිකුත් කර තිබුණා.
අධිකරණය ගිය වර නඩු විභාගයේදී තීන්දු කර තිබුණේ “ද ලයිෆ් ට්රැවලර්” වෙත පනවා තිබූ එම වාරණ නියෝගය ඉවත් කිරීමටයි
මෙම නඩුවේදී ද ලයිෆ් ට්රැවලර් වෙනුවෙන් පෙනී සිටින්නේ ජනාධිපති නීතීඥ ජගත් වික්රමනායක සහ මාධ්ය නීිති සංසදය වෙනුවෙන් නීතීඥ ප්රබෝධ රත්නායකයි.
යූ ටියුබ් නාළිකාවට හා ෆේස් බුක් පිටුවට නිකුත් කර තිබූ වාරණ නියෝගය අනුව ගත වූ මාස කිහිපයක කාලයක් තුළ අදාළ සමාගම පිළිබඳව කරුණු විකාශය කිරීම ගැටලුවක් වී තිබුණා.
