මෙරට තුළ දිනකට හරිහැටි එක ආහාර වේලක් හෝ කෑමට පහසුකම් නැති අය මිලියන 08ක් පමණ සිටින බව මැල්කම් රංජිත් කාදිනල් හිමිපාණන් පවසනවා.
එය මීට මාස කිහිපයකට කලින් හෙලිදරව් වී ඇති බවයි උන්වහන්සේ ප්රකාශ කළේ.
කෙසේ වෙතත් එම සංඛ්යාව ද අද දෙගුණ වී ඇති බව, සිතිය හැකි බව උන්වහන්සේ පවසනවා.
ඊයේ (24) මධ්යම රාත්රියේ නත්තල උදාවත් සමග මෙරට ප්රධාන දේව මෙහෙය පවත්වමින් උන්වහන්සේ මේ බව ප්රකාශ කළා.
මැල්කම් රංජිත් කාදිනල් හිමිපාණන් ගේ ප්රධානත්වයෙන් ප්රධාන දේව මෙහෙය පැවැත්වුණේ කටාන හල්පේ ශාන්ත ෆ්රැන්සිස් සේවියර් මුනිදුන්ගේ දේවස්ථානයේදී.
දරිද්රතාවය සහ නැතිබැරිකම නිසා පීඩාවට පත් ජනතාව ශ්රී ලංකාව තුළ මේ වන විට වැඩි වී ඇති බවයි කාදිනල් හිමියන් පෙන්වා දෙන්නේ.
මෙරට තුළ වෙසෙන බොහෝ දෙනෙක් ජීවත් වන්නේ අනාගතය ගැන සිහින සියල්ල බොඳවුවන් ලෙස බව උන්වහන්සේ පවසනවා.
බදුබර වැඩි වීම විරැකියාව ආදායම් මාර්ග සියල්ල වැසීයාම එදිනෙදා ආහාර සපයා ගැනීමට නොහැකි වීම නිසා දරුවන්ගේ අවශ්යතාවන් පිරිමැසීමට බඩගින්නේ සිටින වැඩිහිටියන් බොහෝමයක් සිටින බව කාදිනල් හිමිපාණන් පෙන්වා දෙනවා.
බෙහෙත්හේත් ලබා ගැනීමට නොහැකිව පීඩාවිඳින්නන් පිරිසත් දරුවන්ගේ අධ්යාපන අවශ්යතා පිරිමසා ගැනීමට නොහැකි පිරිසත් ලබා ගත් ණයතුරුස් ගෙවා ගැනීමට නොහැකි පිරිසත් බොහෝමයක් වන බවයි උන්වහන්සේ ප්රකාශ කළේ.
මේ අතර දූෂණය පිළබඳව ලෝකයේ පළමු පෙළේ රටවල් අතර අප රට ද සිටීම කණගාටු දායක බව උන්වහන්සේ පවසනවා. දූෂිතයන් රැකගන්නා රජයක් ලැබී ඇති බැවින් මේ රට එයින් නිදහස් වන දිනය බොහෝ ඈත බව උන්වහන්සේ අවධාරණය කර සිටියා.
