ඉතිහාසය වෙනස් කරමින් සිංහ කෙල්ලන් ඓතිහාසික ජයක් ලබයි

ඉතිහාසයේ ප්‍රථම වතාවට එංගලන්තයට එරෙහිව විස්සයි විස්ස තරගාවලියක් ජය ගැනීමට ශ්‍රී ලංකා කාන්තා ක්‍රිකට් කණ්ඩායම සමත් වුණා.

ඒ ඊයේ (06) පැවති අවසන් තරගයෙන් එංගලන්ත කාන්තා කණ්ඩායම කඩුලු 7කින් පරාජය කිරීමත් සමඟ යි.

පළමුව පන්දුවට පහරදුන් එංගලන්ත කාන්තා කණ්ඩායම පන්දුවාර 19ක් තුළ සියලු දෙනා දැවී ලකුණු 116ක් රැස් කළා.

පන්දුවට පහරදීමේදී Maia Bouchier ලකුණු 23ක් සහ Danielle Gibson ලකුණු 21 ක් රැස් කළා.

විශිෂ්ට පන්දු යැවීමක නිරත වූ චමරි අතපත්තු ලකුණු 21කට කඩුලු 03ක් බිඳ දැමුවා.

උදේශිකා සහ කවීශා කඩුලු දෙක බැගින් දවා ගත්තා.

ජයග්‍රාහණය සඳහා ලකුණු 117ක ඉලක්කයක් හබා ගිය ශ්‍රී ලංකා කණ්ඩායම පන්දුවාර 17ක් තුළ දී එම ඉලක්කය පසුකර ගියා. ඒ කඩුලු 03ක් පමණක් දැවී සිටියදී.

සුපිරි ඉනිමක් ක්‍රීඩා කළ චමරි අතපත්තු පන්දු 28 කින් ලකුණු 44 ක් රැස් කළා.

හර්ශිතා සමරවික්‍රම නොදැවී ලකුණු 26 යි. අනුෂ්කා සංජීවනී ලකුණු 20ක් ලබා ගත්තා.

ඒ අනුව විස්සයි විස්ස ක්‍රිකට් තරගාවලිය 2-1 ක් ලෙස ජයගැනීමට ශ්‍රී ලංකා කාන්තා කණ්ඩායම සමත් වුණා.

අවසන් තරගයේ මෙන්ම තරගාවලියේ වීරයා චමරි අතපත්තු.