ඇසල පුන් පොහෝ දිනය අදට යෙදී තිබෙනවා.
බෞද්ධ ශාසන ඉතිහාසයේ වැදගත් සිදුවීම් රාශියක් සිදුවූ සුවිශේෂී පොහෝ දිනයක් ලෙස ඇසල පුන් පොහෝ දිනය හැඳින්විය හැකියි.
සිදුහත් බෝසතාණන් වහන්සේ පස්මහ බැලුම් බැලීමෙන් අනතුරුව මිනිස් ලොව උපදින්නට මහ මායා දේවියගේ කුස පිළිසිඳගත්තේ ඇසළ පුන් පොහෝ දිනකයි.
සිදුහත් බෝසතාණන් වහන්සේ ගිහිගෙය හැර මහාභිනිෂ්ක්රමණය කිරීම මෙන්ම රාහුල කුමරුන්ගේ උපත සිදුවන්නේ ද අද වැනි ඇසල පොහෝ දිනකදී.
සිදුහත් බෝසතාණන් වහන්සේ බුද්ධත්වයට පත් වීමෙන් පසු බරණැස ඉසිපතන මිගදායේ දී පළමු වරට පස්වග තවුසන් හට ධම්සක් පැවතුම් සූත්රය දේශනා කළේ අද වැනි ඇසල පුන් පොහෝ දිනකයි.
බෞද්ධ ශාසනික වශයෙන් වැදගත් සිදුවීම් රාශියක් සිදුව ඇති ඇසල පුන් පොහෝ දිනය ලොව පුරා බෞද්ධ ජනතාව මහත් හරසරින් සමරණු ලබයි.