පාසල් ගුරුවරිකයට අයත්ව තිබූ ස්කූටර් වර්ගයේ යතුරුපැදියක් සොරකම් කරගෙන ගොස් මුහුණු පොතේ විකිණීමට පළ කර තිබිය දී ඇගේ පන්තියේ සිසුවකු විසින් සොයා දීමට සමත් වීමේ පුවතක් නාරම්මල පොලීසියෙන් වාර්තා වේ.
නාරම්මල ප්රදේශයේ ගුරුවරියකට අයත් රුපියල් ලක්ෂ පහක් පමණ වටිනා ස්කූටර් වර්ගයේ යතුරුපැදිය ඇගේ නිවසේ නවතා තිබිය දී පසුගිය දිනයක රාත්රියේදී කිසිවකු සොරකම් කරගෙන ගොස් ඒ ආකාරයට මුහුණු පොතේ විකිණීමට දමා තිබී ඇත.
ඇය ඒ සම්බන්ධයෙන් නාරම්මල පොලීසියේ පැමිණිල්ලක් දමා සොරකම් කරන ලද යතුරුපැදිය පිළිබඳ විස්තර තම පන්තියේ සිසුන්ට ද දන්වා එය සොයා ගැනීම සඳහා ඔවුන්ගේ සහාය ද පතා තිබුණා ය. මේ පිළිබඳව අවධානයෙන් පසුවූ එක් සිසුවකු ඒ සම්බන්ධයෙන් සොයා බැලීම සඳහා මුහුණු පොතේ යතුරුපැදි විකිණීමට පළ කරනු ලබන විස්තර සොයා බලත්දී තම ගුරුවරිය පරිහරණය කළ යතුරුපැදිය හා සමාන යතුරුපැදියක් එක් පිටුවක විකිණීමට දමා ඇති ආකාරය දැක තිබේ.
තම ගුරුවරියට අයත් යතුරුපැදියේ ආසනයේ එක් කොටසක් ඉරී තිබෙන බව දුටු ඔහු දිනක් පාසලේ දී ඒ සම්බන්ධයෙන් ගුරුවරියගෙන් විමසා ඉරී ගොස් ඇති ආසනය සකසා ගන්නා ආකාරය පිළිබඳව ඇය දැනුවත් කර ඇත. මේ මතකය තුළින්ම මුහුණු පොතේ දමා තිබූ යතුරුපැදිය පහසුවෙන් ම හඳුනාගත් සිසුවා එය තම ගුරුවරියට අයත් යතුරුපැදිය බව වටහාගෙන ඇත. පසුව ඒ පිළිබඳව නාරම්මල පොලීසිය දැනුවත් කිරීමට පියවර ගෙන ඇත. යතුරුපැදිය විකිණීමට මුහුණු පොතේ පළ කර තිබූ දුරකථන අංකයට උපාය දූතයෙකු යොදා ඇමතුමක් ගත් අපරාධ විමර්ශන අංශයේ ස්ථානාධිපතිවරයා ඇතුළු නිලධාරීන් යතුරුපැදිය මිලදී ගැනීමට කතා කර එකඟතාවකට පැමිණ තිබේ. ඒ අනුව යතුරුපැදිය පන්නල මාකඳුර ප්රදේශයේ ස්ථානයකට රැගෙන ආ අවස්ථාවේදී යතුරුපැදිය සමඟ එය රැගෙන ආ පුද්ගලයා අත්අඩංගුවට ගැනීමට හැකිවී තිබේ. විකිණීම සඳහා ගෙනා යතුරුපැදිය තම යතුරුපැදිය බවට පැමිණිලිකාර ගුරුවරිය විසින්ද හඳුනාගෙන තිබුණි. අත්අඩංගුවට ගත් සැකකරුගෙන් දීර්ඝ ලෙස ප්රශ්න කිරීමේ දී ඒ ආකාරයට විවිධ ප්රදේශවලින් සොරකම් කර තිබූ තවත් යතුරුපැදි 4ක් සොයා ගැනීමට හැකිවී තිබේ. ස්කූටර් වර්ගයේ යතුරුපැදි 2 ක් සහ ගියර් මොඩලයේ යතුරුපැදි 3 ක් සමඟ සොරකමට සම්බන්ධ සැකකරුවන් තිදෙනෙකු අත්අඩංගුවට ගැනීමට විමර්ශන මෙහෙයවූ පොලිස් නිලධාරීහූ සමත් වූහ. කටුපොත , නාරම්මල සහ ගිරිඋල්ල පොලිස් බල ප්රදේශවලින් එම යතුරු පැදි සොරාගෙන ඉතා අඩු මිල ගණන්වලට විකුණා තිබූ බව පොලීසිය පවසයි. මේ යතුරුපැදි සියල්ලම අඟුළු නොදා නිවෙස් වල නවතා තිබියදී සොරකම් කරගෙන ගොස් තිබූ බව ද පොලීසිය සඳහන් කළේය.
කුරුණෑගල දිසාව බාර නියෝජ්ය පොලිස්පති අනිල් ප්රියන්ත මහතාගේ උපදෙස් අනුව කුලියාපිටිය ජ්යෙෂ්ඨ පොලිස් අධිකාරි නෙරංජල අබේවර්ධන මහතාගේ මෙහෙයවීමෙන්
සහකාර පොලිස් අධිකාරි සමන් දිසානායක මහතාගේ අධීක්ෂණය යටතේ නාරම්මල පොලිස් ස්ථානාධිපති ප්රධාන පොලිස් පරීක්ෂක දිල්රුක් පෙරේරා, අපරාධ විමර්ශන
අංශයේ ස්ථානාධිපති පොලිස් පරීක්ෂක එස්. ඒ. . දසනායක මහත්වරුන් ඇතුළු නිලධාරීහූ පිරිසක් විමර්ශන මෙහෙයවූහ.
කුරුණෑගල පුෂ්පකුමාර ජයරත්න
උපුටා ගැනීම – දිනමිණ පුවත්පත
