දේශීය

එක්ස්ප්‍රස් පර්ල් නෞකාව ආසන්නයට ගොස් පරීක්ෂණ කිරීමට මීපා සහ නාරා ආයතන එක්ව පහසුකම් සලසන්න – ආංශික අධීක්ෂණ කාරක සභාව

• නඩු පැවරීම පිළිබද අවසන් තීරණය ගැනීම සදහා අධිකරණ අමාත්‍යවරයා සහ නීතිපතිවරයාගේ ප්‍රධානත්වයෙන් විශේෂ රැස්වීමක්

2021 වසරේ මෙරට මුහුදු සීමාවේදී අනතුරට පත් එක්ස්ප්‍රස් පර්ල් නෞකාවේ ඉතිරිවී ඇති කොටස් ආසන්නයට ගොස්, හානිපූර්ණය ගණනය කිරීම සදහා සාම්පල ලබා ගැනීමට, අදාළ විද්වත් පර්යේෂණ කමිටුවට අවශ්‍ය පහසුකම් සම්පාදනය කර දෙන ලෙස පරිසරය පිළිබද ආංශික අධීක්ෂණ කාරක සභාවේ සභාපති ගරු අජිත් මාන්නප්පෙරුම මහතා පසුගියදා සමුද්‍රීය පරිසර ආරක්ෂණ අධිකාරියට (මීපා) සහ ජාතික ජලජ සම්පත් පර්යේෂණ හා සංවර්ධන නියෝජිතායතනයට (නාරා) දැනුම් දුන්නේය.

පරිසරය පිළිබද ආංශික අධීක්ෂණ කාරක සභාවේ සභාපති ගරු අජිත් මාන්නප්පෙරුම මහතාගේ ප්‍රධානත්වයෙන් 2023.04.04 දින පැවැති මෙම කාරක සභා රැස්වීමට විපක්ෂ නායක ගරු සජිත් ප්‍රේමදාස, අධිකරණ අමාත්‍ය ගරු ආචාර්ය විජේදාස රාජපක්ෂ යන මහත්වරු ද එක්වූහ. එසේම එක්ස්ප්‍රස් පර්ල් නෞකාවේ රක්ෂණ සමාගමේ නියෝජිතයන්ද (P & I Club), පරිසර ඇතුළු හානිය තක්සේරු කිරීම සදහා පත්කළ විද්වත් කමිටු සාමාජිකයන්, නීතිපති දෙපාර්තමේන්තුව, මුදල් අමාත්‍යාංශය, ධීවර අමාත්‍යාංශය යන ආයතනවල නිලධාරීහු ද පරිසරවේදීහු පිරිසක් ද මෙම අවස්ථාවට කැඳවා තිබිණි.

පරිසර හා අනෙකුත් හානි පූර්ණය ගණනය සදහා පත්කළ විද්වත් කමිටු සාමාජිකයන් මෙහිදී පෙන්වා දුන්නේ නැව අසලටම හෝ නැව තුළට යාම නොහැකිවීමෙන් පරිසර හානිය තක්සේරු කිරීමට යම් බාධාවන් ඇති වූ බවයි. අනතුරු බව පෙන්වා දෙමින් නැව අසලට යාම වැළැක්වූවද ඒ සදහා නාවික හා ගුවන් හමුදාවල සහය ලබාගෙන පහසුකම් සැලසීමට කටයුතු කළ යුතුව තිබූ බවද විද්වත් කමිටු සාමාජිකයෝ පෙන්වා දුන්හ. මේ අනුව නැව ආසන්නයෙන්ම මෙම සාම්පල ලබා ගැනීමට නොහැකිවීම වන්දි ඉල්ලා පවරන නඩුවේදී අවාසි සහගතවීමට ඉඩ ඇති බැවින් මෙම කටයුතු කඩිනමින් සලසන ලෙස කමිටු සභාපතිවරයා සමුද්‍රීය පරිසර ආරක්ෂණ අධිකාරියට (මීපා) සහ නාරා ආයතනයට උපදෙස් දුන්නේය.

අදාළ නෞකාවට එරෙහිව නඩු පැවරීම සම්බන්ධයෙන් ද මෙහිදී සාකච්ඡා විය. නඩු පැවරීම සදහා තවදුරටත් ඉතිරිව ඇත්තේ දින 45 ක කාලයක් පමණක් බවත්, මේ වන විට කැබිනට් අනුමතිය හිමිවී ඇති පරිදි නඩු පැවරීම සිංගප්පූරුවේ සිදු කිරී‍ම අවාසි සහගත බවටත් මෙහිදී පරිසරවේදීහු ඇතුළු නීතීඥවරු පිරිසක් කරුණු දැක්වූහ. මේවන විට අනතුරට අදාළව ඇ.ඩො බිලියන 6.2 ක වන්දි මුදලක් ලබා ගැනීමට අදාළ විද්වත් කමිටු වාර්තාව සමුද්‍රීය පරිසර ආරක්ෂණ අධිකාරිය විසින් නීතිපති දෙපාර්තමේන්තුවට යොමුකොට ඇති බවත්, නඩුපැවරීම නීතිපති දෙපාර්තමේන්තුවෙන් සිදුකළයුතු බවත් මෙහිදී සමුද්‍රීය පරිසර ආරක්ෂණ අධිකාරියේ සභාපති නීතිඥ අසේල රැකව මහතා පැවසීය.

මේ අනුව නීතිපති දෙපාර්තමේන්තුවේ නියෝජිතයන් පවසා සිටියේ එම වාර්තාව ඇසුරින් අදාළ වන්දි මුදල් ලබා ගැනීම සදහා නඩු පැවරීමේ කටයුතු කඩිනමින් සිදුකරන බවයි.

මේඅනුව නඩු පැවරීම පිළිබඳ අවසන් තීරණයක් ගැනීම සදහා අධිකරණ අමාත්‍යතුමාගේ ප්‍රධානත්වයෙන් විශේෂ රැස්වීමක් 2023.04.06 වන දින පැවැත්වීමටත්, නීතිපතිවරයා ඇතුළු අදාළ නීතිඥවරුන් මේ සදහා සහභාගී වීමටත් මෙහිදී තීරණය විය.

එසේම මෙම සිද්ධියට අදාළ වන්දි අයකරගැනීමේ ක්‍රියාවලියේ ප්‍රගතිය සමාලෝචනය සදහා අදාළ පාර්ශ්ව සමග පරිසර කටයුතු පිළිබද ආංශික අධීක්ෂණ කාරක සභාව නැවතත් අප්‍රේල් 25 වැනිදා රැස්වීමටත් මෙහිදී තීරණය විය.

රාජ්‍ය අමාත්‍ය ගරු අනුරාධ ජයරත්න, පාර්ලිමේන්තු මන්ත්‍රීවරුන් වන ගරු අකිල එල්ලාවල, ගරු වරුණ ලියනගේ, ගරු නාලක බණ්ඩාර කෝට්ටගොඩ, ගරු උපුල් මහේන්ද්‍ර රාජපක්ෂ යන මහත්වරුද මෙම අවස්ථාවට එක්ව සිටියහ.

:පාර්ලිමේන්තු මාධ්‍ය අංශය

Recent Posts

සමූපකාර තොග වෙළෙඳ සංස්ථාවේ ප්‍රථම තොග අලෙවි මධ්‍යස්ථානය අද මාතරදී විවෘත කෙරේ

සමූපකාර තොග වෙළෙඳ සංස්ථාවේ (ජාතික සතොස) ප්‍රථම තොග අලෙවි මධ්‍යස්ථානය අද (11) මාතරදී විවෘත කිරීමට…

6 days ago

රඹෑව බස් අනතුරෙන් 5 දෙනෙකු මරුට

 රඹෑව ප්‍රදේශයේදී බස් 3ක් ගැටී සිදුවූ අනතුරෙන් 5 දෙනෙකු මියගොස් තිබේ. අනතුරට ලක් වුණේ, ලංගම…

1 week ago

Anyone Can Post, But Should Everyone Be Believed?

One Lie is Small. A Pyramid of Them Looks Like the Truth. By Dinesh Abeywickrama…

1 week ago

ආසියා ශාන්තිකර කලාපීය විද්‍යුත් විකාශකයින්ගේ සංගමයේ මහා සමුළුවේ සමාරම්භක උත්සවය ජනපති ප්‍රධානත්වයෙන්

කැපිටල් මහාරාජා සභාපති ශෂී රාජ මහේන්ද්‍රන් හා කැපිටල් මහාරාජා සමූහ අධ්‍යක්ෂ ෂෙවාන් ඩැනියෙල් සමඟ ජනපති…

2 weeks ago

ජ්‍යෙෂ්ඨ නීතිඥ ලාල් විජේනායකගේ දේහයට ජනපති අවසන් ගෞරව දක්වයි

ශ්‍රී ලංකාවේ ජ්‍යෙෂ්ඨ වාමාංශික දේශපාලන ක්‍රියාකාරිකයෙකු සහ ජාතික ජන බලවේගයේ (NPP) විධායක සභික අභාවප්‍රාප්ත ජ්‍යෙෂ්ඨ…

2 weeks ago

ප්‍රදේශ කිහිපයක අදත් හවසට වැස්ස

බස්නාහිර, සබරගමුව, මධ්‍යම, ඌව සහ දකුණු පළාත්වල සහ කුරුණෑගල, අම්පාර සහ මඩකළපුව දිස්ත්‍රික්කවල පස්වරු 1.00…

2 weeks ago