ගුරු අභියෝගවලට එරෙහිව ගුරුවරුන් ඔන්ලයින් වර්ජනයට

ගුරු සංගම් නායකයින් නිරෝධායන නීති උල්ලංගණය කළ බව පවසමින් ඔවුන් නිරෝධායනයට යොමු කිරීමත් ගුරු සංගම් නායකයින්ට එරෙහිව මර්දනකාරී වැඩපිළිවෙළක් පවතින බවත් පවසා අද (12) දින සිට මාර්ගගත (ඔන්ලයින්) ඉගැන්වීම්වලින් ඉවත්වීමේ වෘත්තීය ක්‍රියාමාර්ගයකට අවතීර්ණ වීමට ලංකා ගුරු සේවා සංගමය තීරණය කර තිබේ.
දින නියමයක් නොමැතිව මෙම ඉගැන්වීම්වලින් ඉවත්වීමට ගුරු සංගමය වෘත්තීය නියෝජිතයින් අනීතිකව රදවාගෙන සිටීම ඇතුළු කරුණු කිහිපයක් මුල් කර ගනිමින් මෙම වෘත්තීය ක්‍රියාමාර්ගය ගෙනයාමට තීරණය කර ඇත.
ආණ්ඩුවේ මර්දනකාරී පිළිවෙතට මුහුණ දීම සඳහා සිය සංගමය සූදානම් බවද ලංකා ගුරු සේවා සංගමයේ ප්‍රධාන ලේකම් මහින්ද ජයසිංහ ඊයේ (11) පැවති ගුරු වෘත්තීය සමිති ඒකාබද්ධ මාධ්‍ය හමුවකදීද අවධාරණය කළේය.
ලංකා ගුරු සංගමය, ලංකා ගුරු සේවා සංගමය, සමස්ත ලංකා එක්සත් ගුරු සංගමය, විදුහල්පති සේවා සංගමය ඇතුළු වෘත්තීය සමිති 14ක් මෙම වෘත්තීය ක්‍රියාමාර්ගයට සහාය වන අතර ශ්‍රී ලංකා නිදහස් ගුරු සේවක සංගමය එයට සහාය දක්වන්නේ නැත.