සීගිරියට අලුත් පෙනුමක්: ඩොලර් මිලියන 30ක සංචාරක සංවර්ධන ව්‍යාපෘතිය ඇරඹේ

ශ්‍රී ලංකාවේ ප්‍රධානතම සංචාරක ගමනාන්තයක් වන දඹුල්ල–සීගිරිය කලාපයේ සංචාරක පහසුකම් සහ යටිතල පහසුකම් වැඩිදියුණු කිරීම සඳහා ඇමරිකානු ඩොලර් මිලියන 30ක ආසියානු සංවර්ධන බැංකු ණය ආධාර යටතේ නව සංවර්ධන ව්‍යාපෘතියක් නිල වශයෙන් ආරම්භ කර තිබේ.

Dambulla–Sigiriya Tourism Sector Development Project ලෙස ක්‍රියාත්මක වන මෙම වැඩසටහන, Sustainable Tourism Sector Development Project යටතේ ක්‍රියාත්මක වන අතර, සංචාරක ගමනාන්තවල යටිතල පහසුකම් වැඩිදියුණු කිරීම, නගර සේවා ශක්තිමත් කිරීම සහ වඩාත් ප්‍රවේශ විය හැකි හා දේශගුණික බලපෑම්වලට ඔරොත්තු දෙන සංචාරක ගමනාන්තයක් නිර්මාණය කිරීම එහි අරමුණු අතර වේ.

ව්‍යාපෘතියේ පළමු පැකේජය යටතේ දඹුල්ල නව නගර බස් නැවතුම්පොළ වැඩිදියුණු කිරීම, සියවසමාවත ප්‍රතිසංස්කරණය කිරීම, සීගිරි වැව සංවර්ධනය කිරීම, සීගිරියේ විදේශීය සංචාරක රථගාල වැඩිදියුණු කිරීම සහ සීගිරි කෞතුකාගාර පරිශ්‍රය හා එළිමහන් රංග පීඨය සංවර්ධනය කිරීම ඇතුළු ව්‍යාපෘති පහක් ක්‍රියාත්මක කිරීමට නියමිතය.

එම ව්‍යාපෘති සඳහා රුපියල් මිලියන 1,206ක පමණ කොන්ත්‍රාත් වටිනාකමක් ඇති අතර, මාස 18ක කාලයක් තුළ ඒවා අවසන් කිරීමට සැලසුම් කර තිබේ.

දෙවන පැකේජය යටතේ මාපාගල, පිදුරංගල සහ කළුදිය පොකුණ ආශ්‍රිත සංරක්ෂණ හා සංවර්ධන කටයුතු සිදු කිරීමට නියමිත අතර, රාමකැලේ සිට තල්කොටේ දක්වා කිලෝමීටර් 11ක Heritage Trail එකක්ද සංවර්ධනය කිරීමට සැලසුම් කර තිබේ.

මෙම දෙවන පැකේජයේ ව්‍යාපෘති සඳහා රුපියල් මිලියන 1,085ක පමණ කොන්ත්‍රාත් වටිනාකමක් ඇති අතර, එම කටයුතු මාස 30ක කාලයක් තුළ අවසන් කිරීමට නියමිත බව වාර්තා වේ.

මෙම වැඩසටහන සඳහා පුරාවිද්‍යා දෙපාර්තමේන්තුව, වනජීවී සංරක්ෂණ දෙපාර්තමේන්තුව, වන සංරක්ෂණ දෙපාර්තමේන්තුව, මධ්‍යම පළාත් සභාව, මාතලේ දිස්ත්‍රික් ලේකම් කාර්යාලය, දඹුල්ල ප්‍රාදේශීය ලේකම් කාර්යාලය, දඹුල්ල ප්‍රාදේශීය සභාව සහ මධ්‍යම සංස්කෘතික අරමුදල ඇතුළු ආයතන රැසක් සම්බන්ධ වී සිටී.

මෙම සංවර්ධන වැඩසටහනේ අරමුණ වන්නේ සීගිරිය සහ දඹුල්ල වැනි ලෝක ප්‍රසිද්ධ සංචාරක ගමනාන්තවල සංචාරක අත්දැකීම වැඩිදියුණු කිරීම පමණක් නොව, ප්‍රදේශීය ජනතාවට සහ ව්‍යාපාරික ප්‍රජාවටද සංචාරක කර්මාන්තයෙන් වැඩි ආර්ථික අවස්ථා නිර්මාණය කිරීමයි.