බ්රිතාන්යයේ ලෙස්ටර් විශ්වවිද්යාලයේ උපකුලපති, මහාචාර්ය නිෂාන් කනගරාජා මහතා බ්රිතාන්යයේ කීර්තිමත් නයිට් පදවියෙන් පිදුම් ලබා ඇත.
උසස් අධ්යාපන ක්ෂේත්රයේ ප්රගමනය වෙනුවෙන් ඔහු ඉටුකළ විශිෂ්ට සහ සුවිශේෂී සේවාව ඇගයීමට ලක්කරමින් මෙම ගෞරව නාමය පිරිනමා තිබේ.
වින්ඩ්සර් මාලිගයේ පැවති නිල ගෞරව සම්මාන පිරිනැමේ උත්සවයේදී , බ්රිතාන්යයේ තෙවන චාල්ස් රජු අතින් ඔහු මෙම උත්තමාචාරයට පාත්ර විය.
මෙම පදවියෙන් පිදුම් ලැබීමත් සමග ඔහුට තම නාමය ඉදිරියට “ශ්රීමත්” (Sir) ගෞරව නාමය භාවිත කිරීමේ සුදුසුකම හිමිවේ.
උසස් අධ්යාපන ක්ෂේත්රයට, විශේෂයෙන්ම සමානාත්මතාවය ප්රවර්ධනය කිරීම වෙනුවෙන් ඉටුකළ විශිෂ්ට සේවය අගයමින් 2026 වසරේ රජුගේ අලුත් අවුරුදු නිර්දේශ නාම ලේඛනයට ද ඔහුගේ නම ඇතුළත් කර තිබුණි.
සාම්ප්රදායික කඩුවෙන් මහාචාර්යවරයාගේ උරහිස ස්පර්ශ කරමින් චාල්ස් රජු විසින් මෙම නයිට් පදවිය පිරිනමා ඇති අතර, චාල්ස් රජු අතින් මෙම සම්මානය ලැබීමට හැකිවීම තමන්ට විශාල ගෞරවයක් බව මහාචාර්ය නිශාන් කනගරාජා මහතා පවසයි.
1966 වසරේ යාපනය ප්රදේශයේ උපත ලැබූ මහාචාර්ය නිෂාන් කනගරාජා මහතා තිදරු පියෙකි.
යාපනය ශාන්ත ජෝන් විද්යාලයේ ආදි සිසුවෙකු වන ඔහු, සිය මූලික හා ද්විතීයික අධ්යාපනයෙන් පසු වැඩිදුර අධ්යාපනය සඳහා බ්රිතාන්යයේ ලොව සුප්රකට කේම්බ්රිජ් විශ්වවිද්යාලයේ ක්රිස්තු විද්යාලයට ඇතුළත් විය.
උපුටා ගැනීම -දිනමිණ