දරුවන් ලෙඩ කරන කෙටි කෑමට සහ පැණි බීමට තහ­න­මක්

පාසල් දරු­වන් අතර බෝ නොවන රෝග ව්‍යාප්තිය පාල­නය සඳහා ‘සෞඛ්‍ය­වත් පාසල් ආප­න­ශාලා මාර්ගෝ­ප­දේ­ශය’ නිල වශ­යෙන් එළි­දැ­ක්වීම කොළඹ වෛද්‍ය පීඨ ශ්‍රව­ණා­ගා­ර­යේදී අද (22) සිදු කරයි. පාසල් දරු­වන් අතර කෙටි කෑම සහ පැණි බීම සංස්කෘ­තිය පාල­නය සඳහා මෙම චක්‍ර­ලේ­ඛය නිකුත් කරන අතර සෞඛ්‍ය සහ අධ්‍යා­පන අමා­ත්‍යාංශ දෙක එක්ව මෙම චක්‍ර­ලේ­ඛය නිකුත් කරයි. අධ්‍යා­පන අමා­ත්‍යාංශ ලේක­ම්ව­රයා විසින් පසු­ගිය පෙබ­ර­වාරි මාස­යේදී නිකුත් කළ විශේෂ චක්‍ර­ලේ­ඛ­යට අනුව මෙම මාර්ගෝ­ප­දේ­ශය එළි­දැ­ක්වීම සිදු කරයි.

ජාතික පෝෂණ මාසය ජූනි මාස­යට යෙදී ඇති අතර “කෙටි ආහාර ගැන නැවත සිතමු” එහි තේමාව වී තිබේ. දරු­වන්ගේ සෞඛ්‍ය­යට අහි­ත­කර ආහාර වර්ග පාසල් ආප­න­ශාලා තුළ අලෙ­විය තහ­නම් කර­මින් ඒ වෙනු­වට වික­ල්ප­යන් ලෙස ස්වාභා­වික හා දේශීය කෙටි ආහාර හඳු­න්වා­දී­මට මෙම­ඟින් කට­යුතු යොදා ඇත. පෝෂණ ගුණ­යෙන් තොර අධි කැලරි සහිත අති-සැකසූ (Ultra-Processed) ආහාර දෛනි­කව ගැනීම නිසා වැඩි­හි­ටි­යන් මෙන්ම දරු­වන් ද දිය­වැ­ඩි­යාව, අධි­රු­ධිර පීඩ­නය, පිළිකා වැනි මාරා­න්තික රෝග­ව­ලට ගොදුරු වන බවට වෛද්‍ය­වරු පව­සති.

සෞඛ්‍ය ප්‍රව­ර්ධන කාර්යාං­ශයේ ගෝලීය පාදක පාසල් සෞඛ්‍ය සමී­ක්ෂ­ණ­යට අනුව වයස අවු­රුදු 13-14 අතර සිටින මෙරට පාසල් දරු­ව­න්ගෙන් සිය­යට 12ක් අධි බරින් සහ සිය­යට 3ක් ස්ථුල­තා­ව­යෙන් පෙළෙන බවට වාර්තා වේ. එසේම සිය­යට 17.4ක් දරු­වන් දින­පතා කාබ­නී­කෘත පැණි බීම පානය කරන අතර සිය­යට 28.5ක් දරු­වන් අධික ලුණු සහ තෙල් සහිත ආහා­ර­ව­ලට ඇබ්බැ­හිව ඇති බවත් සිය­යට 41 ක් දරු­වන් දින­කට එක් වරක් හෝ ඊට වැඩි වාර ගණ­නක් අහි­ත­කර සීනි සහිත කෑම වර්ග පරි­භෝ­ජ­න­යට පුරු­දුව සිටින බවත් එම සමී­ක්ෂ­ණ­යෙන් වාර්තා වී තිබේ.

සන්ධ්‍යා කරු­ණා­රත්න

උපුටාගැනීම – දිනමිණ