පොලිස් උප පරීක්ෂකවරයෙකු සිවිල් පුරවැසියන්ට වැඳ සමාව ගනී

2021 වසරේ කොල්ලුපිටිය පොලිසියට අනුයුක්තව සේවය කළ උප පොලිස් පරීක්ෂකවරයකු අභියාචනාධිකරණය හමුවේ සිංහල ක්‍රමයට වැඳ ආචාර කර සමාව ලබාගෙන තිබෙනවා.

ඒ නීතිඥවරයා සහ අදාළ පුද්ගලික ආයතනයේ මානව සම්පත් කළමනාකරණාකරු සහ සහකාර මානව සම්පත් කළමණාකරුගෙන්.

අදාළ පුද්ගලික ආයතනය තුළ අභ්‍යන්තර විනය පරීක්ෂණයක් සිදුවන අතරතුර සිවිල් ඇඳුමින් සැරසී ගිනි අවියක් අතැතිව තවත් පොලිස් නිලධාරීන් කිහිපදෙනෙකු සමඟ බලහත්කාරයෙන් එම ආයතනයට ඇතුළු වීම සම්බන්ධයෙන් ගොනුකර තිබුණු පෙත්සමේ පළවෙනි වගඋත්තරකරු ලෙස අදාළ උප පොලිස් පරීක්ෂකවරයා නම් කර තිබුණා.

නඩුව කැඳවූ අවස්ථාවේ දී විනිසුරු මඩුල්ල පවසා ඇත්තේ පොලිස් දෙපාර්තමේන්තුව ගැන තිබෙන මහජන විශ්වාසය කඩා වැටී ඇති බවයි.

මෙය අධිකරණය විසින් පොලිසියට කරන අපහාසයක් නොවන බවත් ඇත්තටම මෙය කණගාටුවට ලක්විය යුතු කාරණයක් බවත් විනිසුරු මඩුල්ල පවසා තිබෙනවා.

පොලිස් නිලධාරීන් වැටලීම්වලට යාමේදී නිල ඇඳුම සහ නිල හැඳුනුම්පත භාවිත කළ යුතු බවත් විනිසුරු මඩුල්ල පෙන්වා දෙනවා.

මේ අතර නාරාහේන්පිට පොලිස් ස්ථානයේ සැරයන්වරයෙකු සහ කොස්තාපල් නිලධාරීන් දෙදෙනෙකු අධිකරණය ඉදිරියේ දී පුරවැසියෙකුගෙන් වැඳ සමාව ගත්තේ මීට සති දෙකකට පමණ පෙරදී.

>> https://web.facebook.com/NewsfirstSL/posts/807874068046972