කොළඹ වරායෙන් නැවකට හොරෙන් ඇතුළු වී අමෙරිකා යන්න ගිය ලංකාවේ කොල්ලෝ 4ක් සූවස් ඇලේදී කොටුවෙයි..

කොළඹ වරායේදී නෞකාවකට රහසේ ගොඩවූ බව කියන තරුණයින් සිව්දෙනෙකු ලබන 18 වැනිදා දක්වා රක්ෂිත බන්ධනාගාර ගත කළා.

ඒ, ඔවුන් අද(11) ගාල්ල වැඩබලන මහේස්ත්‍රාත් ප්‍රේමරත්න තිරාණගම මහතා හමුවට ඉදිරිපත් කළ අවස්ථාවේදී.

කොළඹ වරායේදී නෞකාවකට රහසේ ගොඩවූ බව කියන මෙම තරුණයින් සිව්දෙනා ආරක්ෂක අංශවලට හසු වී තිබෙන්නේ එම නෞකාව සූවස් ඇල හරහා යාත්‍රා කරමින් තිබියදී.

අනතුරුව ඔවුන් ඊයේ(10) මෙරට පොලීසියට භාරදෙනු ලැබුවා.

කොළඹ වරායේ නැංගුරම්ලා තිබූ එම නෞකාව, ලයිබීරියාවේ ලියාපදිංචි නෞකාවක්.

මෙම තරුණයින් හතර දෙනා නෞකාවට හොර රහසේ ගොඩවී ඇත්තේ පසුගිය මස 24 වැනිදායි.

ඇමරිකාව බලා ගිය එම නෞකාව සූවස් ඇල හරහා යාත්‍රා කරමින් තිබියදී එහි සිටි මෙම තරුණයින් හමුවී තිබෙනවා.

එම අවස්ථාවේ ඔවුන් නෞකාවේ සේවකයින් ලෙස වෙස්වලාගෙන සිට තිබෙනවා.

එම තරුණයින් සිව්දෙනා මෙරට බලධාරීන් වෙත භාර දීම සදහා චීනය බලා යාත්‍රා කරමින් තිබූ වෙනත් නෞකාවට පසුව භාර දී ඇත.

තරුණයින් සිව් දෙනා මුලතිව්, චුන්නාක්කම්, කයිට්ස්, වැල්වැටිතුරෙයි යන ප්‍රදේශවල පදිංචිකරුවන් බව මේ වනවිට හඳුනාගෙන තිබෙනවා.

ඔවුන් කොළඹ වරායේදී නෞකාවට ඇතුළු වූයේ කෙසේදැයි සෙවීමට මේ වනවිටත් විශේෂ විමර්ශනයක් ආරම්භ කර ඇත.