කුඩු ජාවාරම් කළ වෙලේ සුදාගේ මස්සිනා අල්ලයි…

බැංකු ගිණුමේ ලක්‍ෂ 20 ක්… ත‍්‍රිරෝද රියැදුරකු ලෙස සිටිමින් සුවිශාල නිවසක් ඉදිකරලා.

 ප‍්‍රධාන පෙළේ හෙරොයින් ජාවාරම්කරුවකු වන වෙලේ සුදා රඳවා සිටින බන්ධනාගාරය වෙත ගොස් ඔහුට පහසුකම් සපයමින් මහා පරිමාණයෙන් හෙරොයින් ජාවාරමේ නිරත වූ ඔහුගේ මස්සිනා බව කියන කනත්තෙ චූටී නමැත්තා ඉමදුව පොලිසිය මගින් පෙරේදා රාත්‍රීයේ අත්අඩංගුවට ගෙන තිබෙනවා.
 
ඉමදුව පොලිස් ස්ථානාධිපති ප‍්‍රධාන පොලිස් පරීක්‍ෂක උපුල් කුමාර මහතාට ලැබුණු තොරතුරකට අනුව කළ වැටලීමකදී කනත්තේ චූටි නමැති ජාවාරම්කරු කොටුවී ඇත්තේ රුපියල් පනස් දහසක් පමණ වටිනා හෙරොයින් ළඟ තබාගෙන සිටියදී.

මෙම සැකකරුගේ බැංකු ගිණුම් දෙකක පසුගිය මාස කීපය තුළ රුපියල් ලක්‍ෂ 20 කට අධික මුදලක් සංසරණය වී ඇති බව විමර්ශනවලින් හෙළිවී තිබෙනවා.
 
සැකකරු ති‍්‍රරෝද රථ රියැදුරකු ලෙස රැුකියාව කරන බව කියමින් මහා පරිමාණයෙන් හෙරොයින් ජාවාරමේ නිරතවී ඇති අතර ඉමදුව ප‍්‍රදේශයේ සුවිසල් නිවසක්ද ඉදිකරන බව පොලිසිය කළ පරීක්‍ෂණවලින් අනාවරණය වී තිබේ.
 

 කනත්තේ චූටි නමැති මෙම හෙරොයින් ජාවාරම්කරු වෙලේ සුදාගේ බිරිඳගේ වැඩිමහල් සොහොයුරිය සමඟ විවාහ වී සිට පසුව එම විවාහයෙන් වෙන්වී ඇති බව පොලිසිය පවසයි.
 

 එහෙත් මොහු වෙලේ සුදා සමඟ දීර්ඝ කාලයක සිට තවමත් සමීප සබඳතා පවත්වා ඇති අතර , ඉකුත් ජුලි 11 වැනිදා ද මොහු බූස්ස බන්ධනාගාරය වෙත ගොස් වෙලේ සුදාට අවශ්‍ය ආහාර පාන ඇතුළු සියලූ පහසුකම් ලබාදී තිබූ බව හෙළිවී ඇත.
 
 මෙම සැකකරු පිළිබඳ පොලිසිය සොයන්නට පටන්ගෙන ඇත්තේ ඔහු අසීමිත ලෙස මුදල් පරිහරණය කිරීම සහ සුවිසල් නිවසක් ඉදිකරන බවට ලැබුණු තොරතුරු මතයි.
 
 සැකකරු ඊයේ ගාල්ල ප‍්‍රධාන මහෙස්ත‍්‍රාත් අධිකරණය වෙත ඉදිරිපත් කිරීමෙන් පසු ඔහුගෙන් දින 07 ක් රඳවාගෙන ප‍්‍රශ්න කිරීම සඳහා ගාල්ල ප‍්‍රධාන මහෙස්ත‍්‍රාත් හර්ෂණ කැකුණවෙල මහතා පොලිසියට අවසර ලබා දුන්නා.
 
 සැකකරුගේ බැංකු ගිණුම් වාර්තා හා දුරකථන වාර්තා අධිකරණ නියෝගයක් මගින් ලබාගෙන ඉදිරි විමර්ශන කටයුතු පවත්වාගෙන යන බවද පොලිසිය පවසයි.