වැඩ මුරය පැය 8 කට සීමා කරන ලෙස ඉල්ලා පෙලගැසුණු අමෙරිකානු කම්කරුවන් පිරිසක් හා එක් වූ 65,000ක් පමණ ජන ගඟක් චිකාගෝ නගරය මහා ලේ වැගිරීමකින් කෙළවර කොට එක්තරා දිනයක් ඉතිහාසයේ නොමැකෙන දිනයක් බවට පත් කළා.
ඒ, 1886 මැයි මස අද වැනි දිනකයි.
සාධාරණත්වය වෙනුවෙන් දහස් ගණන් කම්කරුවන් රුධිරයෙන් කළ පරිත්යාගය සදා සැමරීම උදෙසා මැයි 01 වැනිදා ජාත්යන්තර කම්කරු දිනය බවට පත් වුණා.
ලොව පුරා වැඩකරන ජනතාවගේ අයිතිවාසිකම් අවධාරණය කරන සුවිශේෂී දිනයක් බවට පත්වූ ජාත්යන්තර කම්කරු දිනය ශ්රී ලංකාව 1927 වසරේ දී ප්රථම වරට සමරනු ලැබුවා.
ඒ, කම්කරු පක්ෂ නායක ඒ. ඊ. ගුණසිංහගේ ප්රධානත්වයෙන්.
මෙරට ඉතිහාසයේ පළමු මැයි රැළිය 1933 දී කොළඹ ප්රයිස් පිටියෙන් ආරම්භ වී ගාලු මුවදොර පිටිය දක්වා ගමන් කළා.
ප්රථම වරට මැයි දිනය ජාතික නිවාඩු දිනයක් බවට පත්වූයේ 1956 වසරේ සිටයි.
ඒ සඳහා මූලිකත්වය ගනු ලැබුවේ එවකට බණ්ඩාරනායක ආණ්ඩුවේ කම්කරු ඇමතිවරයාව සිටි ටී.බී. ඉලංගරත්නයි.
කම්කරු පිරිස් රැස්ව සැමරූ මැයි රැළිය 1980 දශකය පමණ වන විට විවිධ පක්ෂ, වෘත්තීය සමිති එක් වූ විශාල මැයි රැළි රාශියක් බවට පත් වුණා.
1993 මැයි රැළිය බොහෝ දෙනෙකුට අමතක නොවන මැයි රැළියක් බවට පත් වූ අතර එවකට ජනාධිපති ධූරය දැරූ රණසිංහ ප්රේමදාස එක්සත් ජාතික පක්ෂයේ මැයි දින රැළිය හා ගමන් කරමින් සිටිය දී එල්ල වූ මරාගෙන මැරෙන බෝම්බ ප්රහාරයක් හේතුවෙන් ජවීතක්ෂයට පත් වුණා.
2019 පාස්කු ප්රහාරයත් කොවිඩ් වසංගත අවදානමත් හේතුවෙන් වසර කිහිපයක් නොපැවත් වූ මැයි දින සැමරුම මෙවර උත්කර්ෂවත් අයුරින් සැමරීම සඳහා දේශපාලන පක්ෂ, වෘත්තීය සංවිධාන හා කම්කරු සංවිධානයන් රැසක් සූදානම්ව සිටිනවා.
මෙවර අප සමරනු ලබන්නේ 137 වැනි ලෝක කම්කරු දිනයයි.
මෙරට ප්රධාන දේශපාලන පක්ෂ සංවිධානය කරන මැයි රැළි, කොළඹ සහ මහනුවර නගර කේන්ද්ර කර ගනිමින් අද(01) පැවැත්වීමට නියමිතයි.
ශ්රී ලංකා පොදු ජන පෙරමුණේ මැයි රැළිය අද පස්වරුවේ බොරැල්ල කැම්බල් පිටියේදී පැවැත්වීමට නියමිත බව, පක්ෂ ප්රධාන ලේකම් නීතීඥ සාගර කාරියවසම් සඳහන් කළා.
‘අභියෝග බිඳ අභිලාශ ජය ගනිමු’ යන තේමාව යටතේ මෙවර ශ්රී ලංකාවේ විශාලම මැයි දින සැමරුම පැවැත්වීමට බලාපොරොත්තුවන බව නීතීඥ සාගර කාරියවසම් පවසනවා.
එක්සත් ජාතික පක්ෂයේ මැයි දින රැළිය කොළඹ සුගතදාස ගෘහස්ත ක්රීඩාංගණයේදී පැවැත්වෙන බව පක්ෂ මහ ලේකම්, පාලිත රංගේ බණ්ඩාර සඳහන් කළා.
ජනාධිපතිතුමාගේ උපදෙස් පරිදි නාස්තිකර වියදම්වලින් තොරව ‘ජය ගමු’ යන තේමාව යටතේ මෙවර එක්සත් ජාතික පක්ෂය මැයි දිනය සැමරීමට බලාපොරොත්තු වන බව පාලිත රංගේ බණ්ඩාර පැවසුවා.
‘වැඩ කරන ජනතාවගේ අරගලය’ යන තේමාව යටතේ සමගි ජන බලවේගයේ මැයි දින රැළිය කොළඹ ඒ.ඊ. ගුණසිංහ ක්රීඩාංගණයේදී පැවැත්වීමට සූදානම් කර තිබෙනවා.
ඊට අදාළ මැයි දින පෙළපාලිය මාළිගාවත්ත පී.ඩී. සිරිසේන ක්රීඩාංගණයේදී පස්වරු 1.00ට ආරම්භ වන බව සමගි ජන බලවේගය නිවේදනය කරයි.
නිදහස් ජනතා සභාව සංවිධානය කරන මැයි දින රැළිය අද මහනුවරදී පැවැත්වෙන බව පාර්ලිමෙන්තු මන්ත්රී ඩලස් අලහප්පෙරුම පවසනවා.
අද (01) පස්වරු 2.00ට මහනුවර සහස් උයනේදී ‘නිදහස රටට මැයි’ යන තේමාව යටතේ නිදහස් ජනතා සභාවේ කුළුඳුල් මැයි රැළිය පැවැත් වීමට සූදානම් බව ඩලස් අලහප්පෙරුම සඳහන් කළා.
අද (01) සවස 3.00ට කොළඹ හයිඩ් පාර්ක් පිටියේදී උත්තර ලංකා සභාගයේ මැයි රැළිය පැවැත්වීමට සියලු කටයුතු සූදානම් බව එහි සභපති විමල් වීරවංශ පවසනවා.
උත්තර ලංකා සභාගය නියෝජන කරන සියලු පක්ෂවල නායකයින් එහිදී ජනතාව අමතන බව විමල් වීරවංශ අවධාරණය කරයි.
කොළඹ විහාර මහා දේවි උද්යානය අසල ජනතා විමුක්ති පෙරමුණේ මැයි දින රැළිය පැවැත්වෙනවා.
අද(01) සවස 3.00ට කොළඹ බී.ආර්.සී. පිටියෙන් ආරම්භ කරන මැයි දින පෙළපාලිය , විහාර මහා දේවි උද්යානය වෙත පැමිණීමට නියමිත බව විජිත හේරත් සඳහන් කළා.
‘රට විකුණන ජන පීඩක දූෂීත පාලනය පරදවමු, ජනතාවාදී පාලනයක් ගොඩ නගමු’ යන්න මෙවර ජනතා විමුක්ති පෙරමුණේ මැයි දින තේමාවයි.
ශ්රී ලංකා නිදහස් පක්ෂයේ මැයි දින රැළිය උත්කර්ශවත් අයුරින් අද(01) මහනුවරදී පැවැත්වෙන බව එහි ප්රචාරක ලේකම් තිසර ගුණසිංහ පැවසුවා.
ශ්රී ලංකා නිදහස් පක්ෂයේ මෙවර මැයි දින තේමාව වී ඇත්තේ, ‘සවිමත් වෙමු, එක් වෙමු’ යන්නයි.
පෙරටුගාමි සමාජවාදි පක්ෂයේ මැයි දින රැළිය, නුගේගොඩදි පැවැත්වෙන බව පක්ෂයේ අධ්යාපන ලේකම් පුබුදු ජයගොඩ සඳහන් කළා.
‘IMF උගුලට අමෙරිකානු ඉන්දියානුකරණයට එරෙහිව වැඩකරන ජනතා බලයක්’ යන්න මෙවර පෙරටුගාමි සමාජවාදි පක්ෂයේ මැයි දින තේමාවයි.
සිය මැයි දින පෙළපාලිය අද(01) දහවල් 1.00ට දෙල්කඳ මංසන්දියෙන් ආරම්භ කරන බවත්, මැයි දින රැළිය නුගේගොඩ ආනන්ද සමරකෝන් එළිමහන් රංගපීඨයේදී ආරම්භ කරන බවත් පුබුදු ජයගොඩ ප්රකාශ කළා.
